गगन थापाको राजीनामा अस्वीकृत, १५ औं महाधिवेशन ०८३ असोज १६–१९ गते
नेपाल दर्पण, काठमाडौं ।
नेपाली कांग्रेसले पार्टीको १५ औँ महाधिवेशन आगामी ०८३ को असोज १६ देखि १९ गतेसम्म काठमाडौंमा गर्ने निर्णय गरेको छ । पार्टी मुख्यालय सानेपामा बसेको बैठकले १५औं महाधिवेशनको मिति तय गरेको हो । अब नयाँ कार्यतालिकानुसार वडा अधिवेशन ०८३ को भदौ २, गाउँ÷नगर अधिवेशन भदौ ७ गते, प्रदेश÷क्षेत्रीय अधिवेशन भदौ १७ गते, क्षेत्रीय अधिवेशन भदौ २४ गते गर्ने भएको छ।
यस्तै, जिल्ला अधिवेशन असोज २ र ३ गते र प्रदेश अधिवेशन असोज ७ र ८ गते गर्ने भएको छ। निर्वाचन समिति संयोजकमा नेपाल बार एशोसिएशनका पूर्व अध्यक्ष तथा वरिष्ठ अधिवक्ता प्रेमबहादुर खड्कालाई नियुक्त गरेको छ । यस्तै, पार्टी केन्द्रीय कार्यालयमा मंगलबार र बुधबार दुई दिन बसेको बैठकले विभिन्न १६ वटा निर्णय गरेको हो ।
बैठकले १५औँ महाधिवेशनको कार्यतालिका संशोधन, सम्पत्ति छानबिन उच्चस्तरीय आयोग गठनको माग, केन्द्रीय निर्वाचन समिति गठन, संविधान संशोधन अध्ययन तथा सुझाव समिति बनाउनेलगायत निर्णय गरेको हो । मंगलबारको बैठकमा २८ र बुधबार बसेको बैठकमा ३९ जना गरी ७६ जना केन्द्रीय सदस्यले धारणा राखेका थिए । पार्टी सभापतिबाट दिएको राजीनामा अस्वीकृत भएपछि कांग्रेस सभापति गगनकुमार थापाले मंगलबार आफ्नो मन्तव्य राख्दै बैठक प्रारम्भ गरेका थिए ।
