पूर्वमन्त्री दीपक खड्का पक्राउ, ओली लेखकलाई १० दिन थुनामा राख्न अनुमति माग
नेपाल दर्पण, काठमाडौं ।
पूर्वमन्त्री तथा नेपाली कांग्रेस नेता दीपक खड्कालाई प्रहरीले पक्राउ गरेको छ । नेपाल प्रहरीको केन्द्रीय अनुसन्धान ब्युरो (सिआइबी)ले आइतबार खड्कालाई पक्राउ गरेको हो । ब्युरोका प्रमुख एआइजी मनोजकुमार केसीले सम्पत्ति शुद्धीकरण अन्तर्गत अनुसन्धान गर्न पूर्वमन्त्री खड्कालाई पक्राउ गरिएको पुष्टि गरे । भदौ २४ गते प्रदर्शनकारीहरूले बूढानीलकण्ठस्थित उनको घर जलाइदिएका थिए ।
उनको घरबाट लाखौं रूपैयाँ भेटिएको भन्दै पैसा उडाइएको भिडिओ पनि त्यतिबेला सार्वजनिक भएको थियो । त्यसबारे अनुसन्धान गर्न खड्कालाई पक्राउ गरिएको एआइजी केसीले जानकारी दिए ।
यता हिजो पक्राउ परेका केपी शर्मा ओली र कांग्रेस नेता तथा पूर्व गृहमन्त्री रमेश लेखकलाई १० दिन थुनामा राखेर अनुसन्धान अघि बढाउन सरकारी वकिलको कार्यालयले माग गरेको छ । म्याथ थपको लागि लेखकलाई अदालतमा उपस्थिति गराईएको छ । तर, एमाले अध्यक्ष ओलीको स्वास्थ्य अवस्थाको कारण उनलाई भर्चुअल रुपमा जोडिने बताईएको छ । काठमाडौं जिल्ला अदालतमा बहस जारी छ ।
