बालेनसँग चुनाव हार्ने डरले मतदाताको घरघरमा पुग्दै ओली
नेपाल दर्पण, झापा ।
नेपाल कम्युनिष्ट पार्टी (एमाले) का अध्यक्ष केपी शर्मा ओली हाल आफ्नो क्षेत्रका विभिन्न बस्तीमा पुगेर मतदातासँगको भेटघाट र घरदैलो कार्यक्रममा व्यस्त छन् । आफ्नो निर्वाचन क्षेत्रमा जारी घरदैलो अभियानका क्रममा ओलीले एमालेलाई बहुमतसहितको निर्णायक शक्तिका रूपमा स्थापित गर्न आमनागरिकको पूर्ण साथ रहेको बताए । साथै उनले निर्वाचनमा एमाले एक्लै चुनावी मैदानमा रहने उद्घोष गरेका छन् । अघिल्लो निर्वाचनमा एक–दुई सभालाई सम्बोधन गर्ने ओली यसपटक मतदाताका टोल–टोलमा पुगेर मत मागिरहेका छन् ।
एमाले अध्यक्ष ओली बुधबार र बिहीबार मात्रै निर्वाचन क्षेत्रका २५ भन्दा बढी टोलमा पुगेका छन् । भदौ २३–२४ को जेनजी विद्रोहमा सत्ता गुमाएका ओलीलाई एमालेले भावी प्रधानमन्त्रीको ‘फेस’ बनाएको छ । ओली मनोनयन दर्तापछिको एक महिनामा उनी आफ्नो निर्वाचन क्षेत्र झापा–५ र काठमाडौंमा सीमित बनेका छन् । बदलिएको परिस्थितिमा ओली झापामा जसरी केन्द्रित छन्, यसले उनी फागुन २१ को निर्वाचनमा निकै ठूलो दबाबमा छन् भन्ने देखाएको छ ।
घरदैलोकै क्रममा जेनजी आन्दोलनमा नेताहरूको घरमा भेटिएको भनिएको पैसाको बारेमा प्रश्न गरेका थिए, जवाफमा ओलीले “कसको घरबाट निस्कियो ? मेरोबाट त निस्किएन । सबैको जिम्मा त मैले लिन सक्दिनँ । अरूको कारोबार त मैले थाहा पाउँदिनँ नि ! शेरबहादुरजीको घरमा देखाइएको पैसा अर्कै देशमा कहीँकतै एआईबाट फोटो बनाएर यस्तो देखियो भन्छन् । एउटा हजारको नोट त देखाउँदै हिँडेर जलेको नोट देखियो भनेको मैले पनि देखेँ । हजार–दुई हजार त होला । तर, जुन देखाइयो त्यो नक्कली हो । दुष्प्रचारको भ्रममा पर्नुहुँदैन । मैले भनेको छु, म आफू पनि भ्रष्टाचार गर्दिनँ, अरूलाई पनि गर्न दिन्नँ । हामी छानबिन गर्छाैं प्रमाणित भए कारबाही गर्छाैं । तर, अहिलेको त प्रमाणित हुने कुरा छैन ।”
फागुन २१ मा हुने प्रतिनिधिसभा निर्वाचनका लागि झापा–५ मा ओली र बालेन्द्र शाह (बालेन)सँगै २४ जना उमेदवार छन् । यो क्षेत्रमा ८१ हजार ८१ पुरुष, ८२ हजार २९६ महिला र दुईजना अन्य गरी एक लाख ६३ हजार ३७९ मतदाता छन्, जसमा नौ हजार ९० नयाँ मतदाता थपिएका हुन् । यो क्षेत्रमा ६१ मतदानस्थल र १८५ मतदान केन्द्र छ । जेनजी आन्दोलनपछि उनीप्रति मतदातामा देखिएको निराशा र यही बेला लोकप्रिय रहेका बालेन झापा–५ मा आएपछि ओलीको शैली फेरिएको हो । हुन त बालेन पनि ओलीजस्तै मतदाताका घरघरमा पुगिरहेका छन् ।
