१५ वर्षमा पनि बनेन सिरहा र धनुषा जोड्ने पुल
नेपाल दर्पण, काठमाडौं
नेपालमा विकास निर्माण कार्यमा कतिसम्म लापरवाही र ढिलाइ हुन्छ भन्ने एउटा उदाहरण हो सिरहा र धनुषा सीमा स्थित कमला नदीमा निर्माणाधीन पुल । हुलाकी राजमार्गअन्तर्गत पर्ने यो पुलको निर्माण सुरु भएको झन्डै डेढ दशक बितिसकेको छ । करिब ४६९ मिटर लामो यो पुल निर्माणका लागि ०६८ मै ठेक्का सम्झौता भएको थियो । जसअनुसार साढे तीन वर्षभित्र काम सम्पन्न गर्नुपर्ने थियो । तर अझै यो पुल निर्माण अलपत्र अवस्थामा छ ।
सिरहा र सप्तरी क्षेत्रमा यस्ता धेरै आयोजना वर्षौंदेखि अधुरै छन्, जसले स्थानीय जनतालाई निरन्तर सास्ती दिइरहेका छन् । ठेक्का लिएपछि समयमै आयोजना सम्पन्न नगर्ने नेपालको प्रवृत्ति पुरानै हो । अझ अचम्मको कुरा त, चुनावका बेला यिनै अधुरा आयोजनालाई देखाएर मत माग्ने र जितेपछि बेवास्ता गर्ने चलन पनि दोहोरिँदै आएको छ । पटक पटक म्याद थप्दा पनि पुरा हुन नसकेको यो पुल कहिले पुरा होला भनेर जनता कुरीरहेका छन ।
