झुटो आश्वासन, पेट्रोल, पैसा, रक्सि र मासुभातमा बिकेर भोट नदिनुहोसःलिङदेन

नेपाल दर्पण, काठमाडौं ।

राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले मतदातालाई आफ्नो भोटको महत्व बुझ्न आग्रह गरेका छन । उनले मतदातालाई झुटो आश्वासन, केही लिटर पेट्रोल, रकम वा माछामासु र मादकपदार्थको प्रलोभनमा परेर मतदान नबेच्न भनेका हुन । उनले मतदान गर्नुअघि गम्भीरतापूर्वक सोच्न आग्रह गरेका छन् ।

विगतमा मतदाताले झुटो आश्वासन, केही लिटर पेट्रोल, रकम वा माछामासु र मादकपदार्थको प्रलोभनमा परेर मतदान गरेका उनले टिप्पणी गरे । सत्तामा बस्ने नेताहरूले नयाँ समझदारी नगरे र आफ्ना गल्ती नसच्याए देश दुर्घटनामा जाने लिङ्देनको चेतावनी छ । उनले तत्कालीन राजा, राजनीतिक दल र युवापुस्ताबीच नयाँ समझदारीको आवश्यकता औँल्याए ।

निषेधको राजनीति अन्त्य गरी देशले जित्ने वातावरण बनाउनुपर्नेमा उनले जोड दिए । बुटवलमा आयोजित एक चुनावी सभामा उनले भोट भनेको शक्ति भएको र यसलाई हस्तान्तरण गर्दा हजारचोटि विचार गर्नुपर्ने बताएका हुन् ।