जेनजी आन्दोलनमा १९ जनाको मृत्यु,ओलीको अडान कायमै, गृहमन्त्रीले दिए राजीनामा
नेपाल दर्पण, काठमाडौं ।
प्रधानमन्त्री केपी शर्मा ओलीले प्रतिबन्ध लगाइएका सामाजिक सञ्जाल खोल्न नसकिने अडान लिएका छन । मन्त्रिपरिषद् बैठकमा उनले सूचीकरण नभएसम्म सामाजिक सञ्जालमाथिको प्रतिबन्ध नखोल्ने अडान राखेका एक मन्त्रीले जानकारी दिए । हिंसात्मक प्रदर्शनमा १९ जनाको मृत्यु र सत्ताधारीसहित विभिन्न दलको अनुरोधपछि पनि प्रधानमन्त्री ओलीले आफ्नो अडान कायम राखिरहेका हुन् ।
यसअघि नेपाली कांग्रेस पदाधिकारी तथा पूर्वपदाधिकारीको बैठकपछि सभापति शेरबहादुर देउवाले फोन गरेरै प्रतिबन्ध खोल्न प्रधानमन्त्री ओलीलाई दवाब दिएका थिए । तर प्रधानमन्त्री ओलीले तत्काल प्रतिबन्ध हटाउन नसकिने जवाफ दिएका ती मन्त्रीले बताए । त्यसपछि देउवा र ओलीबीच पुनः वार्ता भइरहेको बताइएको छ ।
यसैबिच गृहमन्त्री रमेश लेखकले राजीनामा दिएका छन् । उनले मन्त्रिपरिषद् बैठकमा उपस्थित भएर राजीनामा दिएको एक मन्त्रीले जानकारी दिए । मन्त्री लेखकले अपुरणीय क्षतीको अनुमान पनि नभएको उल्लेख गर्दै अहिलेसम्म काम गर्ने अवसर दिएको भन्दै प्रधानमन्त्री केपी शर्मा ओलीलाई धन्यवाद दिएका थिए ।
काठमाडौंमा सोमबार भएको प्रदर्शनमा भएको झडपमा कम्तिमा पनि १९ जनाको मृत्यु भएपछि उनको राजीनामा माग गरिएको थियो ।“यो ठूलो घटना भयो, मैले नैतिकताका आधारमा जिम्मेवारी लिँदै म मन्त्री पदबाट ब्याक हुन्छु, हालसम्म सहयोगका लागि प्रधानमन्त्रीज्यूलाई धन्यवाद दिन्छु,” लेखकको भनाइ उद्धृत गर्दै एक मन्त्रीले भने ।
