८४ दिनपछि रिहा भए रवि लामिछाने
नेपाल दर्पण, कास्की ।
सूर्यदर्शन सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछाने रिहा भएका छन् । जिल्ला अदालत कास्कीको आदेशपछि बिहीबार साँझ उनी ६५ लाख धरौटी बुझाएर रिहा भएका हुन् । थुनछेक बहसपछि न्यायाधीश नीतिज राईको इजलासले लामिछानेसँग धरौटी माग गरेको थियो । गत कात्तिक २ गते काठमाडौंबाट पक्राउ परेका लामिछाने ८४ दिनपछि रिहा भएका हुन् । उनीविरुद्ध जिल्ला अदालत काठमाडौंले यसअघि नै पक्राउ पूर्जी जारी गरिसकेको छ ।
काठमाडौं महानगरपालिका–१४ मा सञ्चालित स्वर्णलक्ष्मी सहकारीबाट बचतकर्ताको अर्बौं रकम हिनामिना भएको प्रकरणमा लामिछानेविरुद्ध पक्राउ पूर्जी जारी गरिएको हो । प्रहरी स्रोतका अनुसार लामिछाने काठमाडौं जिल्ला अदालतमा आफैं उपस्थित हुनेछन् । कास्कीबाट रिहा हुनेवित्तिकै उनलाई पक्राउ पर्ने तयारी थियो । तर, आफैं काठमाडौं जिल्ला अदालतमा हाजिर हुने शर्तमा लामिछानेलाई छाडिएको हो ।
रास्वपाका नेता मिलन लिम्बुका अनुसार सभापति लामिछाने आज पोखरा बसेर भोलि विहान काठमाडौं आउनेछन् । ‘उहाँ आज पोखरा नै बस्नुहुन्छ । भोलि विहान काठमाडौं आउनु हुन्छ,’– नेता लिम्बुले रिपोर्टर्स नेपालसँग भने । अदालतबाट रिहा भएसँगै लामिछानेलाई प्रहरीले स्वास्थ्य परीक्षणका लागि फिस्टेल अस्पताल लगेको छ । स्वास्थ्य परीक्षणपछि लामिछानेलाई परिवारका सदस्यको जिम्मा लगाइने प्रहरी स्रोतले बताएको छ ।
