निर्वाचन बिथोल्ने अभिव्यक्तिसहित गतिविधि गरेको आरोपमा दुर्गा प्रसाई पक्राउ

नेपाल दर्पण, काठमाडौं ।

‘राष्ट्र, राष्ट्रियता, धर्म, संस्कृति तथा नागरिक बचाऊ’ अभियान सञ्चालन गर्दै आएका तथा मेडिकल व्यवसायी दुर्गा प्रसार्ई फेरि पक्राउ परेका छन । आज विहानमात्रै आफ्नो निवास भक्तपुरबाट पक्राउ परेका प्रसाईंलाई प्रशासनले पाँच दिन थुनामा राखेर अनुसन्धान गर्न प्रहरीलाई अनुमति दिएको छ । अब प्रसाईं २१ फागनुको निर्वाचनसम्म हिरासतमा नै हुने भएका छन् । उनलाई भक्तपुरमा नै राखिएको छ ।

जिल्ला प्रशासन कार्यालय भक्तपुरले आइतबार (फागुन १७) प्रसाईंलाई चुनावको भोलिपल्ट फागुन २२ गतेसम्म प्रहरी हिरासतमा राख्न अनुमति दिएको छ । अबको चार दिनपछि फागुन २१ गते प्रतिनिधिसभा सदस्यको निर्वाचन हुँदै छ । उनीविरुद्ध निर्वाचन बिथोल्ने अभिव्यक्तिसहित गतिविधि गरेको आरोप छ । सार्वजनिक शान्तिविरुद्धको मुद्दाको अनुसन्धानका लागि भनेर जिल्ला प्रशासन कार्यालयबाट म्याद थप भएको छ । राजा फर्काउने अभियानमा संलग्न प्रसाईं यसअघि पनि पटकपटक पक्राउ परी सर्वोच्च अदालतको आदेशबाट रिहा हुँदै आएका थिए । यसअघि सर्वोच्चको आदेशअनुसार गत फागुन १३ गते रिहा भएका थिए ।