चलचित्र जगतका महान खलपात्र ‘राते काइँला’ सुनिल थापा रहेनन
नेपाल दर्पण, काठमाडौं ।
दर्जनौं चलचित्रमा खलपात्रका रुपमा अभिनय गरेका वरिष्ठ कलाकार सुनिल थापाको निधन भएको छ । आज बिहान स्वास्थ्यमा समस्या आएपछि थापालाई थापाथलीस्थित नर्भीक अस्पताल लगिएको थियो । उनको हृदयाघातका कारण निधन भएको थापाथलीस्थित नर्भिक अस्पतालले जनाएको छ ।
कलाकार संघका अध्यक्ष मोहन निरौलाले थापाको निधन भएको पुष्टि गरेका छन् । “अहिले उहाँको शव थापाथलीस्थित नर्भिक इन्टरनेशनल हस्पिटलमा राखिएको छ,” संघका अध्यक्ष निरौलाले भने, “परिवारका सदस्य आएपछि थप प्रक्रिया अगाडि बढ्नेछ ।” यस्तै कलाकार केदार घिमिरे (माग्ने बुढा)ले सामाजिक सञ्जालबाट जानकारी दिँदै लेखेका छन्, ‘वरिष्ठ कलाकार सुनिल थापा दाइको अप्रत्याशित निधनको खबरले स्तब्ध बनाएको छ । नेपाली चलचित्र उद्योगले आज अर्को एक महान् व्यक्तित्व र बलियो धरोहर गुमाएको छ । कला क्षेत्रमा उहाँले पु¥याउनुभएको योगदान सधैँ स्मरणीय रहनेछ ।
नेपाली चलचित्रमा ‘खलनायक’ को भूमिकालाई पनि नायक सरह चर्चा र सम्मान दिलाउन सफल थापा ‘राते काइँला’ को नामले चर्चित रहेका थिए । उनका परिवारका अन्य सदस्यहरू भारतको मुम्बई बस्दै आएका छन् यो समाचार तयार पार्दा परिवारजनहरु नेपालका लागि प्रस्थान गरेका छन । थापा भने शंखमुलस्थित अपार्टमेन्टमा बस्दै आएका थिए । उनी लामो समयदेखि नेपाली र भारतीय चलचित्र उद्योगमा सक्रिय थिए । नेपाल दर्पणको तर्फबाट महान कलाकारप्रति भावपूर्ण श्रद्धाञ्जली, वैकुण्ठ वास होस् ।
