राष्ट्रिय स्वतन्त्र पार्टीका सभापति रवि लामिछाने अस्पताल भर्ना

नेपाल दर्पण, काठमाण्डौ ।

राष्ट्रिय स्वतन्त्र पार्टी (रास्वपा) का सभापति रवि लामिछाने अस्पताल भर्ना भएका छन् । खुट्टामा लागेको चोटको उपचारका लागि लामिछाने महाराजगञ्जस्थित शिक्षण अस्पताल पुगेका हुन् । लामिछानेको देब्रे खुट्टामा समस्या देखिएपछि त्रिभुवन शिक्षण अस्पताल महाराजगञ्जमा भर्ना भएका स्वकीय सचिव अविनाश आचार्यले बताए ।

उनको देब्र खुट्टाको छालामा संक्रमण देखिएको थियो । सोही कारण उनी घरमा आराम गरेर बसेका थिए । खुट्टा चेकजाँचका क्रममा चिकित्सकले अस्पतालमा भर्ना भएर उपचार गर्न सुझाएपछि उनी भर्ना भएका हुन् । लामिछानेको सचिवालयका अनुसार गएको माघ ५ गते जनकपुरको सभामा उपस्थित हुने क्रममा उनको खुट्टामा चोट लागेको थियो ।

उक्त चोट बढ्न थालेकाले उपचारका लागि शिक्षण अस्पताल पुगेको उनको सचिवालयले जानकारी दिएको छ । त्रिभुवन विश्वविद्यालय शिक्षण अस्पताल, महाराजगञ्जका चिकित्सकहरूको परीक्षण तथा सल्लाहअनुसार यस प्रकारको संक्रमण जोखिमयुक्त हुन सक्ने भएकाले केही दिन अस्पतालमै चिकित्सकको निगरानीमा राखी उपचार गराउनु अनिवार्य भएको जनाइएको छ ।