रास्वपालाई बाहिरबाट दबाब आएपछि एकता भाडियोःकुलमान घिसिङ

नेपाल दर्पण, काठमाण्डौ ।

उज्यालो नेपाल पार्टीका अध्यक्ष कुलमान घिसिङले राष्ट्रिय स्वतन्त्र पार्टी (रास्वपा)सँगको एकताका क्रममा आफूले कुनै पदको ‘बार्गेनिङ’ नगरेको बताएका छन् । अध्यक्ष घिसिङले एकता भंग गर्न रास्वपालाई अन्यत्रबाटै दबाब आएको हुन सक्ने आशंका व्यक्त गरे । शनिबार (माघ १०) काठमाडौंमा आयोजित एक कार्यक्रममा उनले आफू रवि लामिछानेलाई सभापति र बालेन्द्र शाह (बालेन)लाई वरिष्ठ नेता स्वीकार गरेर नै रास्वपासँग एकता प्रक्रियामा गएको भन्दै पदको बार्गेनिङ गरेको भन्ने आरोप सही नभएको बताएका हुन् ।

पार्टी व्यवस्थापनका विषयमा आफूले छलफल गर्दा रास्वपाका शीर्ष तहबाट एकता भंग भएको जानकारी आएको उनले उल्लेख गरे । समानुपातिक उमेदवार चयनका क्रममा उज्यालो नेपाल पार्टीले त्याग नै गरेको उनले जिकिर गरे । प्रत्यक्षमा उज्यालो नेपालका तर्फबाट अलि बढी उमेदवार उठाउने प्रस्ताव आफूहरूले गरेको उनले स्पष्ट पारे । उनले प्रत्यक्षतर्फको उमेदवार उठाउने विषयमा भनाइ राख्दा रास्वपाले एकता भंग गरेको र आफू आश्चर्यचकित भएको उल्लेख गरे ।

घिसिङले जेन–जी सहिद परिवारका लागि रोजगारीको व्यवस्था गर्ने सन्दर्भमा विद्युत् प्राधिकरणसँग छलफल गरी प्राधिकरणको बोर्डबाट सोका लागि स्वीकृत प्राप्त भइसकेको बताएका छन् । उनले यस विषयमा बोर्डले स्वीकृति दिएसँगै हाललाई निवेदन दिएकामध्ये २७ जनाका लागि रोजगारीको व्यवस्था गरिएको जानकारी दिए । ‘हाललाई निवेदन दिएकामध्ये २७ जना गएर काम गर्न सक्नुहुन्छ, बाँकीका लागि पनि थप व्यवस्था गर्दै जाने छौं । हामीले यो व्यवस्थाका लागि सरोकार भएका निकायका प्रतिनिधिसँग समन्वय र सहकार्य गर्दै जाने छौं,’ अध्यक्ष घिसिङले भने । मुलुकको हित र जनचाहना नबुझ्ने शक्तिलाई विस्थापित गरेर जेन–जी सहिदका माग पूरा गर्न सकिने उनले धारणा राखे ।