लेखकलाई आयोगमा बयान दिन कांग्रेस नेताहरुको सुझाव,जेनजी अगुवासँग बयान लिन सुरु
नेपाल दर्पण, काठमाडौं ।
नेपाली कांग्रेसका नेताहरुले नेता रमेश लेखकलाई जाँचबुझ आयोगमा बयान दिन जानका लागि सुझाव दिएका छन् । बुधबार पार्टी केन्द्रीय कार्यालय सानेपामा बसेको बैठकमा नेताहरूले लेखकलाई बयानका लागि जान सुझाव दिएका हुन् ।
बैठकमा सहभागी एक नेताका अनुसार, लेखकलाई आयोगले बयानका लागि बोलाएको विषयमा कुरा उठेको थियो । ‘आजको बैठकमा निवर्तमान गृहमन्त्रीलाई वयान दिन जानुपर्ने विषयमा कुरा उठ्यो । सुझाव दिने साथीहरूले वयान दिन जानू राम्रो हो भन्नुभयो,’ बैठकमा भएको कुराकानीबारे जानकारी गराउँदै प्रवक्ता प्रकाशशरण महतले बताए ।
यता फेरि सरकारले गत भदौ २३ र २४ गते भएको जेनजी आन्दोलनको विषयमा राष्ट्रिय मानव अधिकार आयोगले जेनजी अगुवासँग बयान लिन सुरु गरेको छ । आयोगले आन्दोलनअघि जिल्ला प्रशासन कार्यालय काठमाडौंबाट अनुमति लिन पत्र बुझाउने जेनजी अगुवाहरूसँग बयान लिन सुरु गरेको हो । आज सुरुवाती चरणमा जेनजी अगुवा पुरुषोत्तम यादव र खेमराज साउदलाई आयोगले औपचारिक रूपमा सोधुपुछ गरेको छ । यी दुवै जनालाई भदौ २३ गतेको जेनजी आन्दोलनका लागि प्रशासनबाट अनुमति मागेका थिए ।
