माओवादीको केन्द्रीय समिति भंग, प्रचण्ड अध्यक्ष रहेनन बने संयोजक

नेपाल दर्पण, काठमाडौं ।

नेकपा (माओवादी केन्द्र)को केन्द्रीय समिति भंग गरिएको छ । कमलादीस्थित प्रज्ञा भवनमा शुक्रबार सम्पन्न केन्द्रीय समिति बैठकले केन्द्रीय समिति भंग गरेको हो । पार्टी अध्यक्ष पुष्पकमल दाहाल ‘प्रचण्ड’ को प्रस्तावमा केन्द्रीय कमिटी भंग गरेर आगामी मंसिरमा विशेष महाधिवेशनमा जाने निर्णय भएको हो ।

बैठकले केन्द्रीय समिति भंग गरेर विशेष महाधिवेशनका लागि पुष्पकमल दाहाल ‘प्रचण्ड’ संयोजकत्वमा महाधिवेशन मूल आयोजक समिति गठन गरेको छ । केन्द्रीय समिति भंग भएसँगै अध्यक्ष प्रचण्ड स्वतः संयोजक बनेका हुन् । पदाधिकारी सबै विघटन गरेर महाधिवेशन आयोजक समिति सदस्य बनेका छन् । अन्य सबै समितिका प्रतिनिधि निर्वाचनबाटै चुनिने नेता देवेन्द्र पौडेलले जानकारी दिए ।

केन्द्रीय समिति भंग भएपछि ‘प्रचण्ड’ले आफू अब पार्टीको अध्यक्षको रूपमा नरहेको बताएका छन् । शुक्रबार पार्टीको केन्द्रीय समिति बैठक समापनपछि सञ्चारकर्मीसँग कुरा गर्दै प्रचण्डले आफू अब पार्टीको अध्यक्ष पदमा नरहेको र महाविधेशन आयोजक समितिको संयोजक बनेको बताए । बैठकले आगामी फागुन २१ मा हुने प्रतिनिधिसभाको निर्वाचन सफतापूर्वक सम्पन्न गराउनका लागि सरकारलाई सहयोग गर्ने पनि निर्णय पनि गरेको छ ।