लगातारको वर्षाले मुम्बईको जनजिवन अस्तव्यस्त, रेड अलर्ट जारी

नेपाल दर्पण, मुम्बई ।

चार दिन देखि लगातार आएको वर्षाका कारण मुम्बईको जनजिवन अस्तव्यस्त भएको छ । मुम्बईका विभिन्न स्थानहरुमा पानी जम्मा भएर यातायात मुख्य रुपमा प्रभावित बनेको छ । रोडमा ठूलाठूला खाल्डाहरु परेका छन । मौसम विभागले मुम्बई र यसको उपनगरहरूमा वर्षाको लागि रेड अलर्ट जारी गरेको छ । घर, विद्यालय, कार्यालयदेखि सडकसम्म जताततै पानी छ । धेरै क्षेत्रहरूमा घरहरूको पहिलो तल्लासम्म पानी पुग्यो । वर्षाको अवस्थालाई ध्यानमा राख्दै, मंगलबार विद्यालयहरू बन्द गरिएको छ । सरकारी कार्यालयहरू बन्द छन् र निजी कम्पनीहरूले कर्मचारीहरूलाई घरबाट काम गर्न पठाएका छन् ।

वर्षासँग सम्बन्धित घटनाहरूमा अहिलेसम्म ८ जनाको मृत्यु भइसकेको जानकारी प्राप्त भएको छ । मुम्बईको लाइफलाइन मानिने स्थानीय रेलहरू नराम्ररी प्रभावित भएका छन् । भारी वर्षाको चेतावनीको कारण मंगलबार मुम्बईमा सबै सरकारी र अर्ध–सरकारी कार्यालयहरू बन्द गरिएको बीएमसीले जनाएको छ । मुम्बईका सबै निजी प्रतिष्ठानहरूलाई आफ्ना कर्मचारीहरूलाई घरबाट काम गर्न अनुमति दिन अपील गरिएको थियो, त्यसपछि कम्पनीहरूले आफ्ना कर्मचारीहरूलाई घरबाट काम गर्न सन्देश पठाएका छन ।

बीएमसीले मुम्बई र उपनगरहरूमा निरन्तर भारी वर्षाका कारण धेरै क्षेत्रहरू डुबानमा परेको बताएको छ । खतरा अझै समाप्त भएको छैन । आईएमडीले वर्षाको सम्बन्धमा रेड अलर्ट जारी गरेको छ । सावधानीका रूपमा सबै सरकारी र अर्धसरकारी कार्यालयहरू बन्द घोषणा गरिएको छ । बीएमसीले आपतकालीन सेवाहरूसँग सम्बन्धित कार्यालयहरू बाहेक सबै कार्यालयहरूमा निर्देशनहरू लागू गरिएको बताएको छ । एक अधिकारीले भने कि मंगलबार बिहान ८ बजेसम्मको २४ घण्टामा मुम्बईमा मात्र १८६.४३ मिमी वर्षा भएको छ । जबकि पूर्वी उपनगरहरूमा २०८.७८ मिलिमिटर वर्षा भएको छ र पश्चिमी उपनगरहरूमा २३८.१९ मिलिमिटर औसत वर्षा रेकर्ड गरिएको छ ।