ओलीले पूर्वाग्रहका साथ भ्रष्टाचार मुद्दा लगाइएको नेपालको दाबी

नेपाल दर्पण, काठमाण्डौं ।

नेकपा एकीकृत समाजवादीका अध्यक्ष एवं पूर्वप्रधानमन्त्री माधव नेपालले पूर्वाग्रहका साथ प्रधानमन्त्री एवं एमाले अध्यक्ष केपी ओलीले आफूमाथि भ्रष्टाचार मुद्दा लगाइएको दाबी गरेका छन् । ‘नेपालको राजनीतिमा हाम्रो पार्टीको भूमिका महत्त्वपूर्ण रहेको छ, पार्टीको महत्वपूर्ण भूमिका देखेर कतिपय व्यक्तिहरू आत्तिएका छन्’, ओलीलाई लक्षित गर्दै उनले भने, ‘पूर्वाग्रह राखेका छन्, बदलाको भावनाले उनीहरूलाई पोलिरहेको छ । त्यसैको एउटा उदाहरण ममाथि भ्रष्टाचारको मुद्दा लगाउन पहल भएको छ ।’

अध्यक्ष नेपालले आफूले गल्ती नगरेकाले न्यायालयले न्याय दिने विश्वास पनि व्यक्त गरे । ‘मैले भन्ने गरेको छु, नबिराउनू–नडराउनू । आफ्नो स्वार्थको लागि कुनै काम भएको छैन भनेर आत्तिनुपर्ने छैन । गलत आरोपमा दृढतासाथ उभिन्छौं । मलाई विश्वास छ न्यायपालिकाले मलाई न्याय दिनेछ, हामीले न्यायालयलाई विश्वास गर्नुपर्छ ।’

नेपालले पतञ्जली जग्गा प्रकरणमा आफूले कुनै अनुचित काम नगरेको दोहो¥याएका छन् । शनिबार (जेठ २४) काठमाडौंमा पार्टीनिकट मधेस प्रदेश सम्पर्क कमिटीको प्रथम अधिवेशनमा उनले आफूमाथि पूर्वाग्रह राखेर भ्रष्टाचारको मुद्दा दर्ता गरिएको बताए । उनले आफूले कहिल्यै घुस नलिएको र देश तथा जनतालाई घात हुने कुनै अनुचित काम नगरेको बताए । देश र जनतालाई नोक्सान हुने केही काम गरेको भए त्यसको सम्पूर्ण जिम्मेवारी लिने उनले उल्लेख गरे ।

“भ्रष्टाचारको केस निर्णयको आधार चाहिन्छ । माधव नेपालले कसैसँग एक नयाँ पैसा घुस लिएको भए, एक दाम जग्गा घुस लिएको भए, अनुचित काम गरेको भए, देश र जनतालाई नोक्सान हुने कुनै काम गरेको भए त्यसको सम्पूर्ण जिम्मेवारी म लिन तयार छु,” उनले भने । उनले पतञ्जली जग्गा प्रकरणमा आफूमाथि लगाएको आरोपविरुद्ध दृढतासाथ उभिने बताए ।