सरकार र आन्दोलनरत शिक्षकबीच सहमति
नेपाल दर्पण, काठमाडौं ।
सरकार र आन्दोलनरत शिक्षकबीच सहमति भएको छ । सिंहदरवारमा भएको छलफलमा सरकार र शिक्षकबीच सहमति भएको हो । बैठकमा शिक्षक आन्दोलन रोक्ने सहमति भएको प्रतिनिधिसभाअन्तर्गतको शिक्षा समितिका सभापति अम्मरबहादुर थापाले जानकारी दिए । “वार्ता सकारात्मक भएको छ, शिक्षक आन्दोलन रोक्ने सहमति भएको छ,“ उनले भने ।
मन्त्रिपरिषदको बैठकबाट नौबुँदे सहमति निर्णय गर्ने र यो अधिवेशनबाट ऐन पास गर्ने सहमति भएको उनले जानकारी दिए । सिंहरदरबारमा भएको वार्तापछि सहमतिलाई अनुमोदन गर्न मन्त्रिपरिषद् बैठक बस्दैछ । मन्त्रिपरिषद् बैठकले निर्णय गरिसकेपछि आन्दोलनरत शिक्षकहरुले पत्रकार सम्मेलन गरेर धारणा सार्वजनिक गर्ने तयारी गरेका छन् ।
अहिले वार्ताबाट मन्त्रीहरु मन्त्रिपरिषद् बैठकमा सहभागिताका लागि गएको हुनाले आन्दोलनरत शिक्षकले उनीहरुलाई पर्खिएको शिक्षा समितिका सभापति थापाले जानकारी दिएका छन् । सहमतिको ड्राफ्ट लिएर शिक्षामन्त्री रघुजी पन्त मन्त्रिपरिषद् बैठकका लागि निस्किएका छन् । वार्तास्थलबाट निस्किने क्रममा उनले वार्ता सकारात्मक भएको प्रतिक्रिया दिए । गृहमन्त्री रमेश लेखक र शिक्षामन्त्री पन्त आन्दोलनरत शिक्षकसँग वार्ता गर्न बसेका थिए ।
नेकपा एमालेका प्रमुख सचेतक महेश बर्तौलाले पनि वार्ता सकारात्मक भएको बताए । उनले आज नै सहमति गरी सार्वजनिक गर्ने तयारी गरिरहेको बताए । शिक्षकका माग मन्त्रिपरिषद् बैठकबाट सम्बोधन गरिने बताइएको छ । त्यसकै लागि प्रधानमन्त्री केपी शर्मा ओलीले आज मन्त्रिपरिषद् बैठक बोलाएका छन् ।
