दुई समुदायबीचको झडपपछि वीरगञ्जमा जारी कफ्र्यु लम्बियो

नेपाल दर्पण, वीरगन्ज ।

हनुमान जयन्तीको अवसरमा आयोजित शोभायात्राका क्रममा शनिबार दुई समुदायबीच झडप भएर स्थिति तनावग्रस्त बनेपछि प्रशासनले जारी गरेको कफ्र्यु आदेश लम्बिएको छ । जिल्ला प्रशासन कार्यालय पर्साले वीरगन्जमा कफ्र्युको समय थप गरेको हो । आइतबार राती १२ बजेसम्म कफ्र्यू थप गरेको जिल्ला प्रशासन कार्यालयले जनाएको छ ।

पर्साका प्रमुख जिल्ला अधिकारी गणेश अर्यालका अनुसार आइतबार राती १२ बजेसम्मका लागि कफ्र्युको समय थप गरिएको हो । कफ्र्यूको समय थप गरेसँगै वीरगन्जमा सुरक्षा व्यवस्था कडा पारिएको छ । उनका अनुसार पूर्वमा वीरगन्ज–१५ मा रहेको भेडियाही चोक, पश्चिममा वीरगन्ज–२५ को सिर्सिया चोक, उत्तरमा वीगरन्ज–१४ को गण्डक चोक र दक्षिणमा वीरगन्ज–१६ को शंकराचार्य चोकसम्म कफ्र्यु लगाइएको हो ।

हिजो (शनिबार) हनुमान जन्मोत्सवका अवसरमा वीरगन्जमा दुई समुदायबीच झडप भएको थियो । त्यसपछि प्रशासनले स्थिति नियन्त्रणमा लिन कफ्र्यु आदेश जारी गरेको थियो । पर्साका प्रमुख जिल्ला अधिकारी गणेश अर्यालका अनुसार दुवै समुदायबीच सहमति हुन नसकेपछि कफ्र्यु आदेश लम्ब्याइएको हो । शनिबारको झडपमा सर्वसाधारण र सुरक्षाकर्मी गरेर ३७ जना घाइते भएका थिए । प्रशासनले पूर्वमा बाईपास रोड, पश्चिमतर्फ सिर्सिया पुल, उत्तरतर्फ पावर हाउस चोक र दक्षिणमा शंकराचार्य गेट सीमाना तोकी कफ्र्यु आदेश जारी गरेको हो ।

‘हिजो मिति २०८१÷१२÷३० गते साँझ ७ः३० बजेदेखि मिति २०८१÷१२÷३१ गते दिनको १२ बजेसम्म स्थानीय प्रशासन ऐन, २०२८ को दफा ६ (क) बमोजिम पर्सा जिल्लाको वीरगंज महानगरपालिका क्षेत्र भित्रका केही स्थानहरुमा आवत जावत गर्न, कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने गरी कफ्र्यू आदेश जारी गरिएकोमा देहाय बमोजिमका चार किल्ला तोकी आज मिति २०८१÷१२÷३१ गते राति १२ः०० बजेसम्मका लागि उक्त कफ्र्यू आदेशको समयावधि थप गरिएको छ,’– प्रमु्ख जिल्ला अधिकारीद्वारा अर्यालद्वारा जारी आदेशमा भनिएको छ ।