‘लोकतन्त्र जति प्रचण्डको हो, त्यत्ति नै ज्ञानेन्द्र शाहको पनि हो’

नेपाल दर्पण, काठमाडौं ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले लोकतन्त्रभित्रै आफ्नो ठाउँ खोज्न उनले राजावादीहरुलाई आग्रह गरेका छन । मंगलबार प्रतिनिधिसभा बैठकलाई सम्बोधन गर्दै प्रचण्डले सरकारको बेथिति र असफलताले व्यवस्थाप्रति मोहभंग भएको र त्यसका कारण देखिएको असन्तुष्टिका कारण पुरातनवादी शक्तिहरू हौसिएको उनको तर्क छ ।

‘लोकतन्त्र जति प्रचण्डको हो, त्यत्ति नै व्यक्ति ज्ञानेन्द्र शाहको पनि हो भन्ने मान्यता हामी राजनीतिक दलहरुले राखेका छौं र हाम्रो संविधानले त्यो मान्यता स्थापित गरेको छ । यो कुरालाई कमजोरी नठानियोस् । तर, लोकतन्त्रका मूलभूत सिद्धान्त नमानेर असंवैधानिक र अलोकतान्त्रिक बाटो रोजियो भने क्रान्तिले फेरि एकपटक आफ्नो शक्ति देखाउने छ । यो चुनौती पनि म राख्न चाहन्छु,’– प्रचण्डले भने । सरकारको विश्वसनियता सकिएका कारण पुरातनवादी शक्तिहरू हौसिएको बताएका छन् ।

प्रचण्डले सरकार असफल भइरहेको र पुरातनवादीले समेत प्रतिगमन र प्रतिक्रान्तिको तरबार चलाउने सपना देखिरहेकाले सरकारका गलत क्रियाकलाप र प्रतिगामी चलखेलविरुद्ध जुध्नुपर्ने विशिष्ट अवस्था सिर्जना भएको बताए । राजावादीको चहलपहलको पछाडि देशभित्र र बाहिरका संगठित चलखेल देखिएको उनले बताए । संसारका विभिन्न देशहरूमा तानाशाही राजाहरूको अन्त्य कसरी भएको छ भन्ने बिर्सिएर नेपालको शान्ति प्रक्रिया र गणतन्त्रको मौलिकतालाई कम नआक्न उनले चेतावनीसमेत दिए । उनले लोकतन्त्रभित्र आफ्नो ठाउँ खोज्न पूर्वराजा ज्ञानेन्द्र शाहलाई सुझाव दिए । आफू ८ महिना अघिसम्म सरकारका रहँदा नदेखिएको असन्तुष्टि अहिलेको सरकार बनेपछि जनतामा असन्तुष्टि र आक्रोश बढ्दै गएको उनले बताए । प्रचण्डले दुई तिहाइको घोडा सरकारका प्रधानमन्त्री र मन्त्रीले चलाएको आफूले नदेखेको भन्दै सरकारलाई विचौलियाले चलाइरहेको आरोपसमेत लगाए ।

राजतन्त्रमा गणतन्त्र माग्दा टाउकाको मोल तोकिएको स्मरण गराउँदै उनले अहिले राजावादी साथीहरु सम्मानित संसदमै रहेको बताए । उनले लोकतन्त्र र राजतन्त्रको तुलना यस कारण पनि हुन नसक्ने बताए । विचारका रुपमा राजतन्त्रसँग आफ्नो असहमति रहेको बताउँदै प्रचण्डले लोकतान्त्रिक हकको भने सम्मान गरिने बताए । प्रचण्डले १ सय ६ वर्ष अघि राजतन्त्र समाप्त भएको रुस, १ सय ७५ वर्षअघि राजतन्त्र समाप्त भएको फ्रान्स, सर्विया, बुल्गेरिया, इरान, अफगानिस्तान लगायतका देशमा अझैं पनि राजावादी पार्टीहरु अस्तित्वमा रहेको उनले बताए ।