सांसद किनेर अध्यादेश पारित गराउने तयारी गरिएको लिङदेन र यादवको आरोप

नेपाल दर्पण, काठमाडौं ।

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले सरकारले सांसद किनेर अध्यादेश पारित गराउने तयारी थालेको आरोप लगाएका छन् । आज (शनिबार) बुटवलमा आयोजित पार्टीको कार्यक्रमलाई सम्बोधन गर्दै उनले अध्यादेशबाट शासन गर्न खोज्ने सरकारको प्रयास असफल हुने देखिएपछि सांसद किन्ने तयारी भइरहेको बताएका हुन् । उनले वर्तमान व्यवस्था काम नलाग्ने सावित भइसकेको दाबी गरे ।

साथै, उनले वर्तमान सरकार बनेको सात महिनामा कुनै पनि उपलब्धीमूलक काम नभएको बताए । अध्यक्ष लिङ्देनले प्रतिनिधि सभाको पहिला र दोस्रो ठूलो दल मिलेर सरकार बन्दा पनि जनतामा कुनै आशा जगाउने खालको काम हुन नसकेको बताए ।

यस्तै, सरकारलाई समर्थन गरेको दल जनता समाजवादी पार्टी (जसपा) नेपालका अध्यक्ष उपेन्द्र यादवले पनि सरकारले सांसदहरु किन्ने प्रयास गरिरहेको आरोप लगाएका थिए । यादवले भूमाफियाले भूमिसम्बन्धी अध्यादेश पारित गराउन सरकारमाथि चर्को दबाब दिएको आरोप लगाएका छन् । उनका अनुसार सरकार सांसद ‘किन्न’ अर्बौं खर्च गर्न तयार रहेको छ ।

प्रधानमन्त्री खड्गप्रसाद शर्मा ओलीको सरकारले केही दिन पहिले भूमिसम्बन्धीलगायत ६ वटा अध्यादेश जारी गराएको थियो । संसद्को अधिवेशन बोलाउनुपर्ने बेला भइसक्ता पनि नबोलाई अध्यादेश जारी गराउने सरकारको कदमको उतिबेलै व्यापक आलोचना पनि भएको हो ।