४० वर्षदेखि महिला अन्तरराष्ट्रिय फुटबल फाइनल यात्रामा नेपालको सधै हार

नेपाल दर्पण, काठमाडौं ।

फोर नेशन्स अन्तरराष्ट्रिय महिला च्याम्पियनसिपको उपाधि म्यान्माले जितेको छ । फाइनलमा हार बेहोर्ने नियतिले निरन्तरता पाउँदा बुधबार नेपाली राष्ट्रिय महिला टिम म्यानमारसँग फेरि स्तब्ध बन्यो । नेपाल म्यानमारसँग २–० ले पराजित बनेको हो । त्रिपुरेश्वरस्थित दशरथ रंगाशालामा आज साँझ भएको फाइनलमा म्यान्माले उपाधि उचालेको हो । झण्डै चार दशक लामो महिला अन्तरराष्ट्रिय फुटबल यात्रामा अहिलेसम्म नेपालले उपाधि जित्न सकेको छैन । अहिलेसम्म नेपालले १३ वटा फाइनल खेल्दा सबै फाइनलमा हार बेहोरेको छ ।

साफ च्याम्पियनसिप, साग र अन्य ३ प्रतियोगितामा नेपाल फाइनलमा पराजित भएको तितो इतिहास छ । यो नेपाली महिला टिमले बेहोरेको १३ औं फाइनलको हार हो । नेपालले सन् १९८६ को डिसेम्बरमा पहिलो अन्तर्राष्ट्रिय फुटबल खेलेको थियो । हङकङविरुद्ध पहिलोपटक अन्तर्राष्ट्रिय खेलको अनुभव लिएको नेपालले त्यसयता महिला फुटबलमा उल्लेखनीय प्रगति गर्न सकेको छैन । पहिलो अन्तर्राष्ट्रिय खेलदेखि अन्तर्राष्ट्रिय महिला च्याम्पियनसिपसम्म नेपालले ३९ वर्षमा कुल १३ अन्तर्राष्ट्रिय प्रतियोगिताको फाइनल खेलिसक्यो । तर, नतिजा– सधैँ उपविजेता ।

आज पहिलो हाफमा दुवै टोलीले बराबरी खेले पनि दोस्रो हाफ सुरु भएको केही समयमै म्यान्माले नेपालविरुद्ध लगातार दुई गोल गरेको थियो । म्यान्माका लागि खेलको ६२ औँ मिनेटमा यु पर खिनले गोल गर्दै अग्रता दिलाएकी थिइन् । त्यसको दुई मिनेटपछि खेलको ६४ औँ मिनेटमा कप्तान विन थेइङ्गी तुनले अर्को गोल थप्दै म्यान्माको अग्रता दोब्बर बनाइन् । बक्सको दायाँ भागबाट हानेको प्रहार नेपाली किपर एन्जिलाले रोकेकी थिइन् तर पूर्णरुपमा क्लियर नभएको बल पुनः विनले पाइन् । उनले छातीले हानेको बल गोलमा परिणत भयो ।

गीता रानाले बल रोक्ने प्रयास गरे पनि सफल हुन सकिनन् । सन् २०१९ को फरवरीमा भारतको भुवनेश्वरमा भएको हिरो गोल्ड कपमा नेपाल र म्यान्माले फाइनल खेलेका थिए । उक्त खेलमा पनि नेपाल पराजित भएको थियो । नेपालले अहिलेसम्मका म्यान्मासँगको ५ भेटमा हराउन सकेको छैन । गत कार्तिकमा घरेलु मैदानमा भएको साफ च्याम्यिनसीपमा नेपाल फाइनलमा बंगालादेशसँग पराजित हुँदै उपविजेतामा सिमित बनेको थियो ।

नेपालले हालसम्म ६ पटक साफ महिला च्याम्पियनसिप, तीनपटक साग गेम्सअन्तर्गतको महिला फुटबल, एकपटक हिरो कप, एकपटक नादेज्दा कप, एकपटक वाफ महिला च्याम्पियनसिप र एक पटक अन्तर्राष्ट्रिय महिला च्याम्पियनसिपको फाइनल खेले पनि सबैमा हार बेहोरेको छ । यसबाहेक, बंगलादेश र म्यानमारसँग समान दुईपटक हार बेहोर्दा ताजिकिस्तान र जोर्डनसँग नेपालले समान एकपटक फाइनलमा हार बेहोरेको छ ।