बालेन र हर्क प्रत्यक्ष निर्वाचित कार्यकारी भएपनि फरक पर्दैनःप्रचण्ड

नेपाल दर्पण, काठमाडौं ।

नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले काठमाडौं महानगरपालिका प्रमुख बालेन्द्र शाह, धरान उपमहानगरपालिका प्रमुख हर्क साम्पाङ लगायतका व्यक्ति प्रत्यक्ष निर्वाचित कार्यकारी भएर राष्ट्रपति बनेपनि आफुहरुलाई केही फरक नपर्ने बताएका छन ।

प्रत्यक्ष निर्वाचित कार्यकारी प्रणाली आफूहरुको एजेण्डा रहेको बताएका छन् । आज (बुधबार) प्रेस सेन्टर नेपालले विराटनगरमा आयोजना गरेको पत्रकार सम्मेलनलाई सम्बोधन गर्दै उनले देशमा भ्रष्टाचार रोक्ने, सुशासन र स्थायित्व खोज्ने हो भने सिस्टम सुहाउँदै शासकीय स्वरुप प्रत्यक्ष निर्वाचित कार्यकारी प्रमुख चाहिने बताएका हुन् । उनले बालेन र हर्कको नाम लिँदै सञ्चारकर्मीहरुले सोधेको प्रश्नमा अध्यक्ष प्रचण्डले उनीहरुलाई लोकतन्त्रको फूलको संज्ञा दिए ।

प्रचण्डले हर्क, बालेनलगायतका मानिसहरुलाई आफूले आफ्नै मान्छे ठानेको पनि बताए । ‘हर्क आएपनि फरक पर्दैन, बालेन आए पनि फरक पर्दैन । के बिग्रन्छ र ? मैले त उनीहरूलाई लोकतन्त्रको फूल भनेको छु ।’ दाहालले देशमा प्रत्यक्ष निर्वाचित कार्यकारी प्रमुख भएमा राजनीतिक विसङ्गतिको अन्त्य भई जनताको शान्ति र समृद्धिको चाहना पूरा हुने बताए ।

यस्तै फरक प्रसंगमा ‘प्रचण्ड’ले पूर्व–पश्चिम हुलाकी मार्ग केन्द्रित जागरण अभियानबाट जनताका समस्या बुझ्न मद्दत पुग्ने बताएका छन् । अध्यक्ष दाहालले भने, “आर्थिक विकासका निम्ति जागरण अभियान आवश्यक छ, यसबाट उत्पादन र उत्पादकत्व बढाउन पनि मद्दत मिल्नेछ । मेचीदेखि महाकालीसम्मको यो अभियान सुशासनका निम्ति पनि हो।” अभियानबाट जनता उत्साहित भएका बताउँदै उनले परिवर्तनको संवाहक नेकपा माओवादी केन्द्र रहेको बताए ।