सानो देशमा छु भन्ने हिनताबोधी भावना नराख्न प्रधानमन्त्रीको आग्रह

नेपाल दर्पण, काठमाडौं ।

प्रधानमन्त्री केपी शर्मा ओलीले इमानदार भएर देशका लागि काम गर्न विद्यार्थीलाई आग्रह गरेका छन् । बिहीबार कास्कीको ढुंगेपाटनमा पोखरा विश्वविद्यालयको २० औँ दीक्षान्त समारोहलाई सम्बोधन गर्दै प्रधानमन्त्री ओलीले आत्मविश्वास र इमानदारपूर्वक समाजका लागि सकारात्मक काममा आफूले प्राप्त गरेको ज्ञान इमान्दार भएर देशका लागि उपयोग गर्न आग्रह गरे । ओलीले नेपाल ज्ञान, दर्शन, योग र खोजको उद्गम मुलुक भएकाले दीक्षित विद्यार्थीहरूले इमानदार भएर देशका लागि काम गर्नुपर्नेमा जोड दिएका छन् ।

सानो देशमा छु भन्ने हिनताबोधी भावना नराख्न आग्रह गर्दै उनले कुनै पनि देशको सार्वभौमसत्ता सानो वा ठूलो नहुने बताए । प्रधानमन्त्री ओली नेपालमा उर्बर भूमि रहेकाले यसलाई रूपान्तरणकारी विकासमा लान सकिने धारणा राखे । ‘इमानदारिताले मात्रै सकारात्मक सफलता पाउन सकिन्छ । बेइमानी गरेर पाएको सफलता समाजका लागि उपयोगी हुँदैन । तपाईँहरूले राम्रो पढेको हो भने पनि त्यसलाई समाजमा नकारात्मकता, चोरी, ठगीजस्ता अपराधका काममा प्रयोग गरेमा त्यसलाई सफलता मान्न सकिँदैन ।’, कुलपति ओलीले भने, ‘तपाईँहरू समाज र देशका लागि उपयोगी हुनुपर्छ । आफ्ना लागि मात्रै गर्न खोजेमा स्वार्थी भइन्छ । देश र समाजका लागि केही गर्नुस् । नागरिक सर्वाेच्चताको गर्व तपाईँहरुमा होस् ।’

उनले सानो देशमा छु भन्ने हिनताबोधी भावना राख्नु नराख्न आग्रह गर्दै कुनै पनि देशको सार्वभौमसत्ता सानो वा ठुलो नहुने दोहोर्याए । ‘हात्ती देख्नेबित्तिकै भागेमा माउते हुन सकिँदैन । हात्तीलाई तालिम दिएर माउते हुने कोसिस गर्नुस् । साहसी हुनुस्, दुस्साहासी नहुनुस् ।’, प्रधानमन्त्री ओलीले भने, ‘हामीसँग उर्बर भूमि छ । यसलाई रुपान्तरणकारी विकासमा लान सकिन्छ । यस काममा विश्वविद्यालय लागोस् । सरकार विश्वविद्यालयको साथमा छ ।’

समारोहमा कुलपति ओलीले विश्वविद्यालयका विभिन्न संकाय र तहका गरी सात हजार आठ सय ७२ विद्यार्थीलाई दीक्षित गराउनुका साथै उनले सर्वाेत्कृष्ट विद्यार्थीहरूलाई पुरस्कृत पनि गरेका थिए ।