रामेछापमा गाडी दुर्घटना हुँदा वडा अध्यक्षसहित ५ जनाको मृत्यु
नेपाल दर्पण, काठमाडौं ।
रामेछापको गाडी दुर्घटना हुँदा वडा अध्यक्षसहित पाँच जनाको ज्यान गएको छ । रामेछापको गोकुलगंगा गाउँपालिका–६ सिमलडाँडा भीरमा फोर्स गाडी दुर्घटना भएको हो । ना १ ज ७१२३ नम्बरको गाडीमा सवार पाँच जनाको घटनास्थलमै मृत्यु भएको रामेछाप प्रहरीले जनाएको छ । चौध सिट क्षमता भएको गाडीमा आठजना सवार रहेको खुलेको छ ।
दुर्घटनामा परेर गोकुलगंगा गाउँपालिका वडा नम्बर ४ का वडाध्यक्ष रामचन्द्र बस्नेतसहित ५ जनाको मृत्यु भएको जिल्ला प्रहरी कार्यालय रामेछाप प्रहरीले जनाएको छ । दुर्घटनास्थल दुर्गम र विकट क्षेत्र भएकाले उद्धारका लागि कठिनाइ भएको र घाइतेहरूलाई उपचारका लागि हस्पिटल पठाउने काम भइरहेको पनि प्रहरीले बताएको छ ।
प्रहरीका अनुसार दुर्घटनामा मृत्यु हुनेमा चालक हिराबहादुर कार्कीसमेत छन् । अन्य मृतकको पहिचान खुलेको छैन । घटनाबारे थप विवरण प्राप्त हुने क्रम जारी छ । वडाध्यक्ष बस्नेत स्थानीय तह निर्वाचनमा नेपाली कांग्रेसबाट उम्मेदवार बनेर चुनाव जितेका थिए ।
