भारतमा रहेका ५० लाख नेपाली जनताको योगदानले भारत सशक्त र बलियोः जोली

नेपाल दर्पण, काठमाडौं ।

नेपाल र चीनबिचको बिआई सम्झौताबारे भारतले चासो राखेको छ । भारतीय जनता पार्टीका प्रभावाली नेता तथा पूर्व विदेश विभाग प्रमुख डा. विजय जोलीले यसबारे चासो व्यक्त गरेका हुन । उनले नेपालका प्रधानमन्त्री आफ्नो गठबन्धनको मित्रको साथ मिलेर बीआरआईबारे जुनप्रकारको रणनीतिक सम्झौता गर्नुहुन्छ, मलाई आशा छ त्यो नेपालको हितमा हुनेछ । आज उहाँ चीन जाँदै हुनुहुन्छ, भोलि भारत आउँदा हामी स्वागत गर्छौं ।’ प्रधानमन्त्री ओलीको आसन्न चीन भ्रमण र बीआरआईबारे के धारणा छ भनेर पत्रकारेले राखेको जिज्ञासामा नेता जोलीले नेपालका प्रधानमन्त्रीले कुन देश भ्रमण गर्ने भन्ने कुरा नेपालको निर्णय हुने भन्दै त्यसलाई आफूले सम्मान गर्ने बताए ।

नेपालमा बनेको कांग्रेस–एमालेको सत्ता गठबन्धनलाई आफूहरुले स्वागत गर्ने भन्दै यो गठबन्धन नै नेपालका लागि समयको माग भएको टिप्पणी गरेका छन् । उनले भने,‘आजको सन्दर्भमा नेपालमा कांग्रेस र एमालेको गठबन्धन छ, प्रधानमन्त्री केपी शर्मा ओलीजी र शेरबहादुर देउवाको नेतृत्वमा चलिरहेको सरकारलाई हामी स्वागत गर्छौं । यो गठबन्धन आजको समयको माग हो । कांग्रेस र एमालेको गठबन्धन नेपालको लोककल्याणको लागि हो ।’ उनले हरेक देशले आफ्नो स्वार्थको लागि कुटनीतिक रुपमा हात मिलाउने गरेको सुनाए । उनले भने,‘तर, यो आशा गर्छों कि सानो सानो मुद्दामा राजनीतिक प्रेरित राजनीतिक इस्युमा हुँदैन, हरेक देश आफ्नो देशको स्वार्थको लागि कुटनीतिक विश्वस्तरमा हात मिलाउँछन्, मित्रताको आयाम खोल्छन् । हाम्रो प्रधानमन्त्री नरेन्द्र मोदी र चिनियाँ राष्ट्रपति सि जिनपिङले भुटानदेखि लद्दाकसम्मको सिमा विवाद सम्वाद र कुटनीतिक संलग्नताको माध्यम र समझदारीले सुल्झाउने पहल लिनुभएको छ, यो वैश्विक शान्तिको लागि पनि नेपाल, भारत, चीन, बंगलादेश, पाकिस्तान, श्रीलंका र भुटानको परिप्रेक्ष्यमा पनि लागु हुन्छ ।’

उनले नेपालमाथि भारतले नाकाबन्दी गरेको आरोप लगाएपनि त्यसमा सत्यता नभएको जिकिर गरे । उनले भने,‘हामीमाथि नेपालमा नाकाबन्दी लगाएको आरोप थियो । जुन सरासर राजनीतिबाट प्रेरिरत थियो ।’ नेपालका राजनीतिक दलको आन्दोलन र सिमामा अवरोधको कारण त्यस्तो अवस्था सिर्जना भएको उनको भनाई थियो । नेपाल र नेपाली मोटाप्रति आफ्नो उच्च सम्मान र लगाव रहेको पनि जोलीले सुनाए । उनले आफू भारतीय जनता पार्टीको विदेश विभाग प्रमुख भैसकेको नाताले पनि विगत लामो समयदेखि नेपाल आवातजावत गर्ने गरेको स्मरण गराए ।

उनले ५० लाख नेपाली जनता अहिले पनि भारतमा रोजगारीमा रहेको तथ्यांक पेश गरे । उनीहरुको योगदानको कारण भारत अहिले सशक्त र बलियो बनेको जोलीको भनाई छ । पछिल्लो समय नेपाल र भारतबीच आर्थिक र व्यापारिक सम्बन्धपनि बलियो र प्रगाढ भैरहेको जोलीको दाबी छ । उनले भने,‘भारत र नेपालबीच सैनिक क्षेत्रमा पनि राम्रो साझेदारी छ । भारतका आर्मी चिफ पनि अहिले नेपाल भ्रमणमा हुनुहुून्छ । राष्ट्रपतिद्धारा सर्वोत्तम उपाधिबाट सम्मान हुँदैछ । दुवै देशले सूर्यकिरण नामको संयुक्त सैन्य अभ्यास गरिहेका छन् ।’ भारतले नेपालका विद्यार्थीहरुको लागि उच्च शिक्षामा छात्रावृत्तिपनि प्रदान गर्दै आएको उनले स्मरण गराए । उनले भारत र नेपालको सम्बन्ध सकारात्मक आधारशिलामा रहेको दाबी गरे । उनले भने,‘मलाई आशा छ–जनता जनताबीचको मित्रता नै दुई देशबीचको सम्बन्धको आधारशिला हो ।’