नेपाल महिला क्रिकेट टीम अण्डर १९ टी–२० विश्वकपका लागि छनोट

नेपाल दर्पण, काठमाडौं ।

नेपाल यूएईलाई पराजित गर्दै आईसीसी महिला यू–१९ टी–२० विश्वकपका लागि छनोट भएको छ । नेपाल घरेलु यूएईलाई ८ विकेटले पराजित गर्दै विश्वकपमा छानिन सफल भएको हो । घरेलु टिम युनाइटेड अरब इमिरेट्स (यूएई) विरुद्ध आठ विकेटको सहज जित निकाल्दै नेपाली युवा महिला क्रिकेट टिम आईसीसी यू–१९ विश्वकपमा छनोट भएको हो । नेपाली यू–१९ महिला क्रिकेट टिम पहिलोपटक विश्वकपमा छनोट भएको हो ।

यूएईको सेभेन डिस्ट्रिक मैदानमा सम्पन्न खेलमा यूएईले प्रस्तुत गरेको ८४ रनको लक्ष्य नेपालले १४.४ ओभरमा पूरा गरेसँगै विश्वकप यात्रा तय गरेको हो । विश्वकपमा छनोट हुन आज नेपालले यूएईविरुद्ध १६.२ ओभरमा जित निकाल्न पर्ने समीकरण थियो । समीकरणभन्दा अघि नै जित निकालेसँगै नेपाली युवा महिला टिम यू–१९ विश्वकपमा छनोट भएको हो ।

नेपालको जितमा ओपनर साना प्रविनले अविजित ३५ रन बनाइन् । उनले ४२ बलमा एक चौका प्रहार गरिन् । यस्तै, कप्तान पुजा महतोले २१, सोनी पाख्रिनले १३ र सवित्री धामीले १२ रन थपिन् । यूएईकी मेहक ठाकुरले दुई विकेट लिएकी थिइन् । त्यसअघि टस जितेर ब्याटिङमा आएको घरेलु टिमले निर्धारित २० ओभरमा नौ विकेट गुमाएर ८३ रनको योगफल खडा गरेको थियो । यूएईकी समाइरा धर्निधर्काले ३१ रन बनाएकी थिइन् । रिनिथा रजिथले २० र इन्दुजा नन्दाकुमारले १० रन थपिन् । यसबाहेक, अन्य ब्याटरले दोहोरो अंकमा रन जोड्न सकेनन् । यूएईका चार ब्याटर शून्यमा आउट भएका थिए ।

नेपालबाट कृष्मा गुरुङले चार विकेट लिएकी थिइन् । चार ओभर बलिङ गरेकी कृष्माले १३ रन खर्चिइन् । सिमा केसी र रिया शर्माले समान दुई विकेट लिँदा रचना कुमारी चौधरीले एक विकेट हात पारिन् । जितसँगै नेपालले यूएईलाई नेट रनरेटमा पछि पारेको हो । नेपालले ६ खेलबाट १० अंक जोड्यो र युएईले पनि ६ खेलबाटै १० अंक जोडेको भए पनि नेपाल नेट रनरेटका आधारमा यूएईलाई उछिन्दै विश्वकपमा छानिन सफल भएको हो । नेपालले कुवेतलाई १०८ रन र १६५ रनले तथा थाइल्याण्डलाई ६७ रन र १०६ रनले पराजित गरेको थियो । प्रतियोगितामा नेपाल, यूएई, कुवेत र थाइल्यान्डको सहभागिता थियो ।