८ किलोभन्दा बढी सुन बरामद, दुई भारतीय पक्राउ

नेपाल दर्पण, काठमाडौं ।

मकवानपुरको हेटौंडाबाट आठ किलोभन्दा बढी सुनसहित दुई भारतीय पक्राउ परेका छन् । उक्त सुनको मूल्य ११ करोडभन्दा बढी रहेको बताइएको छ । प्रहरीका अनुसार बिहान ३ बजेको समयमा पथलैयाबाट हेटौंडातर्फ आउँदै गरेको बागमती प्रदेश ०२–०४७ प ७५०३ नम्बरको स्कुटरलाई रोकी चेकजाँच गर्ने क्रममा उनीहरूको साथमा ११ करोड ४३ लाख ५७ हजार ८७८ रुपैयाँ ६५० पैसा बराबरको अवैध सुन फेला परेको जिल्ला प्रहरीका कार्यालयका डीएसपी श्याम अर्यालले जानकारी दिए ।

पक्राउ पर्नेमा भारतको महाराष्ट्र राज्य सांगली जिल्लाका २५ वर्षीय अभिषेक अजिनाथ कुटी र २७ वर्षीय राहुल भिट्टिहाल बाड छन् । उनीहरू दुवैलाई थप अनुसन्धान तथा कारवाहीका लाग िराजस्व अनुसन्धान कार्यालय पथलैया पठाएको डीएसपी अर्यालले बताए । स्कुटर चालक अभिषेक र स्कुटरमा सवार राहुलको साथबाट ८ वटा बिस्कुटको आकारको (तौल गर्दा ८ किलो २४३ ग्राम ९७० मिलिग्राम) सुन बरामद भएको मकवानपुरका प्रहरी उपरीक्षक विश्वराज खड्काले बताए ।